Strukturat e Serbisë obligojnë dhe kërcënojnë serbët e Kosovës për pjesëmarrje në protestën në Rudare

Sipas një qytetareje serbe edhe personat e sëmurë që kanë nevojë për trajtim mjekësor në shtëpi, i kanë obliguar që të marrin pjesë në protestë, me qëllim që protesta të duket sa më masovike.

“Një fqinji im i cili është i sëmurë dhe qëndron në shtëpi, e kanë detyruar që të marrë pjesë në protestë, apo në të kundërtën do t’i ndalin ndihmat që ai merr dhe nuk do të mund të trajtohet në asnjë institucion shëndetësor serb”, tha ajo.

Këta qytetarë deklarohen se nuk janë të interesuar për politikë. “Mua nuk më intereson politika, më intereson të kem para për të jetuar dhe një jetë të sigurt”, tha ai.

Ndërsa qytetari tjetër deklaron se “Serbët e Kosovës, nuk mund të jenë vegël e Vuçiqit dhe grupeve të tij kriminale, që të përdoren për interesa të tyre”.

I ashtuquajturi “shtabi i krizës së popullit serb nga veriu i Kosovës” bëri thirrje për protestë sot  pas kinse “kërcënimeve të fundit të Albin Kurtit”, i cili, sipas tyre, bëri thirrje për zhdukjen e popullit serb dhe vrasjen e serbëve në barrikada.

“Ftojmë popullin serb që jeton në Kosovë në protestën më të madhe publike ndonjëherë, e cila do të mbahet të enjten më 22 dhjetor në ora 12:00 në Rudar afër kryqit, ku populli ynë i përbërë nga mjekët tanë, profesorët, mësuesit, minatorët, të afërmit, fqinjët, nënat, motrat tona të mblidhen së bashku për të dërguar një mesazh të qartë të përbashkët se ne nuk pajtohemi me persekutim dhe vrasje dhe se veriu i Kosovës nuk është as Gjermania dhe as fundi i Kurtit, por vendi ku jetojmë dhe ku duam të qëndrojmë e të mbijetojmë”, thuhet në njoftim.