Me drogë në veturë në mes të Vushtrrisë – Policia arreston një person dhe sekuestron substancën narkotike

Një kontroll rutinë i policisë në rrugën “Ismajl Qemali” në Vushtrri përfundoi me një arrestim të dyshuar për posedim të narkotikëve. Ngjarja ka ndodhur mbrëmjen e së enjtes, më 5 qershor 2025, rreth orës 21:20, kur njësitë policore ndaluan një veturë të dyshimtë për kontroll, njofton Mitropol.

Gjatë verifikimeve, brenda automjetit u gjetën dhe u konfiskuan 4.7 gramë substancë e dyshuar narkotike, sasi që mjaftoi për të ngritur dyshime për shkelje të ligjit.

I dyshuari u arrestua menjëherë në vendin e ngjarjes dhe u shoqërua në stacionin policor për intervistim.

Pas procedurave të nevojshme hetimore dhe me vendim të prokurorit të rastit, ndaj tij është caktuar procedurë e rregullt, ndërsa i dyshuari është liruar.

Policia apelon për bashkëpunim nga qytetarët dhe kujdes të shtuar në respektimin e ligjeve, sidomos atyre që ndërlidhen me substancat narkotike./Mitropol/