Zbardhen detaje të reja rreth alarmit për bombë në Kuvendin e Kosovës – Ja se si arriti lajmi në zyrën e Glauk Konjufcës

Detaje të reja kanë dalë në dritë lidhur me kërcënimin për vendosjen e një bombe në ndërtesën e Kuvendit të Kosovës — ngjarje që çoi në evakuimin e menjëhershëm të objektit dhe aktivizimin e njësive të sigurisë, shkruan Mitropol.

Sipas burimeve, një mesazh kërcënues në gjuhën angleze është dërguar në adresën elektronike të një punonjëseje në zyrën e Kryetarit të Kuvendit, Glauk Konjufca. Në përmbajtje, thuhej se një bombë ishte vendosur brenda ndërtesës dhe se ajo do të shpërthente brenda 10 minutash.

Pas marrjes së mesazhit, punonjësja ka informuar menjëherë njësitë e sigurisë, të cilat kanë reaguar me shpejtësi, duke ndërmarrë masat e para operative.

Brenda pak minutash, perimetri i objektit është rrethuar nga policia, ndërsa të gjithë zyrtarët dhe stafi janë evakuuar për shkak të rrezikut të mundshëm për sigurinë.

Në vendin e ngjarjes kanë mbërritur edhe Njësia Hetimore dhe forenzika, që janë duke analizuar përmbajtjen dhe origjinën e mesazhit. Po ashtu, Njësia e Deminimit po kryen një kontroll të detajuar fizik të objektit.

Deri më tani, nuk është gjetur ndonjë mjet i dyshuar shpërthyes, por hetimet vazhdojnë. Autoritetet kanë nisur edhe analizimin e gjurmës dixhitale të dërguesit përmes adresës IP dhe serverit nga ku është dërguar mesazhi./Mitropol/