Senati i ShBA-së voton për bllokimin e kompetencave të Trumpit për veprime ushtarake në Venezuelë

Senati i Shteteve të Bashkuara të enjten votoi në favor të bllokimit të presidentit Donald Trump nga ndërmarrja e veprimeve të mëtejme ushtarake në Venezuelë pa miratim nga Kongresi, pasi forcat amerikane e kapën presidentin e këtij vendi, Nicolas Maduro.

Disa senatorë të Partisë Republikane u ndanë nga grupi i tyre politik për ta çuar përpara rezolutën rreth kompetencave të luftës – një oqritm i rrallë dhe i dalluar ndaj presidentit – edhe pse shumica e Partisë Republikane vazhdon të qëndrojë prapa operacionit në Venezuelë, raporton medium amerikan “Axios”.

Senati votoi me 52 vota “për” e 47 “kundër”. Pesë senatorë republikanë u bënë bashkë me kolegët e tyre demokratë për ta mbështetur masën.

Republikanët e Senatit vitin e kaluar kishin refuzuar rezoluta të ngjashme me të cilat do të bllokohej fushata e Trumpit me sulme ajrore kundër barkave të dyshimta të drogës afër brigjeve të Venezuelës. Më shumë se 100 njerëz janë vrarë në ato sulme.

Votimi i së enjtes ishte procedural, por ai tregon se ka mbështetje të mjaftueshme në Senat për ta miratuar rezolutën, gjë që pritet të ndodhë javën e ardhshme.

Praprëseprapë, rezoluta do të duhej të shqyrtohej nga Shtëpia e Bardhë, e cila ka thënë se Trumpi do ta bllokonte këtë masë përmes vetos.

Operacioni për ta kapur Maduron ka nxitur frikë në Partinë Republikane dhe në Partinë Demokratike se Shtëpia e Bardhë mund të jetë duke shqyrtuar sulme kundër Grenlandës dhe disa vendeve të Amerikës Latine – siç ka lënë të kuptohet Trumpi.

Në një deklaratë të rrallë të nënshkruar nga senator të dy partive iu bë thirrje Trumpit që “t’i respektojë sovranitetin dhe integritetin territorial të Mbretërisë së Danimarkës”, ku përfshihet edhe Grenlanda.