EKSKLUZIVE | E tmerrshme: Arrestohet punëtori teknik i një shkolle fillore në Vushtrri, dyshohet për sulm seksual ndaj nxëneses 7 vjeçare

Një rast i rëndë i dyshuar si sulm seksual ndaj një të miture 7 vjeçare ka ndodhur të mërkurën në Vushtrri, mëson ekskluzivisht “Mitropol”.

Sipas raportit zyrtar të Policisë, më datë 1 prill 2026, rreth orës 12:00, është arrestuar burri i dyshuar pasi që i njëjti dyshohet se kishte sulmuar seksualisht një vajzë.

Ndërkohë, burime ekskluzive “Mitropol” bëjnë të ditur se rasti ka ndodhur brenda një shkolle fillore në Vushtrri. Sipas këtyre burimeve, rreth orës 14:30 të së njëjtës ditë, drejtori i shkollës ka njoftuar Policinë lidhur me dyshimet për ngacmim seksual ndaj një nxënëseje të klasës së dytë, e moshës 7 vjeçare.

Pas arritjes në vendin e ngjarjes, policia është informuar se i dyshuari është një punëtor teknik i shkollës, 34 vjeçari me inicialet I.A., i lindur në vitin 1992 dhe me vendbanim në Vushtrri. I njëjti është mbajtur në ambientet e shkollës deri në ardhjen e njësive të tjera policore, të cilat më pas e kanë shoqëruar në stacion policor për procedura të mëtejme.

“Mitropol” mëson se ndaj të dyshuarit janë ndërmarrë veprimet e nevojshme procedurale, ndërsa rasti është duke u trajtuar nga organet kompetente.

Për shkak të ndjeshmërisë së rastit dhe për të mbrojtur viktimën, “Mitropol” nuk do të publikojë asnjë detaj që mund të çojë në identifikimin e saj, përfshirë emrin e shkollës apo informacione të tjera shtesë që cenojnë privatësinë e të miturës.

Me vendim të prokurorit, pas intervistimit, i dyshuari është dërguar në mbajtje. Hetimet lidhur me këtë rast janë në vazhdim./Mitropol/

SHËNIM: Personi i apostrofuar në këtë artikull konsiderohet i pafajshëm deri në një vendim të formës së prerë nga Gjykata.