Dy raste të ndara të kalimit ilegal të kufirit janë regjistruar gjatë së martës në veri të Kosovës, njofton Mitropol, bazuar në raportin 24-orësh të Policisë së Kosovës.
Rasti i parë ka ndodhur rreth orës 13:00 në pikën kufitare në Jarinjë, ku është ndaluar një shtetas i Serbisë, i dyshuar se kishte kaluar ilegalisht kufirin ndërmjet Serbisë dhe Kosovës. Pas intervistimit, me vendim të prokurorit, ai është liruar në procedurë të rregullt.
Ndërkaq, rasti i dytë është regjistruar rreth orës 20:20 në fshatin Koshuticë të Leposaviqit, ku është ndaluar një burrë i dyshuar pasi dyshohet se kishte kaluar ilegalisht kufirin Serbi–Kosovë. Edhe në këtë rast, pas intervistimit dhe me vendim të prokurorit, i dyshuari është liruar, ndërsa rasti vazhdon në procedurë të rregullt.
Policia e Kosovës po vazhdon trajtimin e rasteve në përputhje me procedurat ligjore./Mitropol/
