Albin Kurti: Sot e korigjuam dëmin e shkaktuar para 7 vjetëve, “TREPÇËS” ia kthyem terminalin doganor
Kryeministri i Republikës së Kosovës, Albin Kurti, sot ka marrë pjesë në ceremonin e hapjes së terminalit doganor në Mitrovicë, shkruan Mitropol.
Ai ka theksuar se përmes hapjes së këtij terminali, është evituar dëmi i shkaktuar para shtatë viteve nga qeveritë e kaluara.
Kurti, e ka kritikuar vendimin e vitit 2014, sipas të cilit terminali i Trepçës iu dha në shfrytëzim një kompanie private. Ai theksoi se me këtë vendim ka pësuar dëme ekonomike gjigandi i mineraleve dhe i gjithë vendi.
Këto komente Kurti i ka bërë përmes një postimi në facebook, ku tutje ka premtuar se deri në fund të vitit terminalet doganore do të shtrihen në të gjithë vendin.
Postimi i plotë:
Sot ishte një ditë e rëndësishme për të gjithë ne. E korrigjuam një dëm të para shtatë vjetëve: ia rikthyem Trepçës terminalin doganor.
Me këtë veprim janë ndihmuar të gjithë: shteti i Kosovës e Trepça, Doganat e Kosovës e Qeveria e Kosovës, qytetarët, por në veçanti bizneset dhe të bërit biznes.
Nga viti 2003 deri në vitin 2014 terminali doganor ka qenë në hapësirën e Trepçës. Padrejtësisht e çuditërisht ky terminal doganor i është dhënë një privati jashtë zonës së Trepçës, me ç’rast çmimi është shtrenjtuar në 40 euro për maune.
Kësisoj kanë humbur bizneset, por ka humbur edhe Trepça. 24 punëtorë që punonin në terminal patën ngelur pa punë, ndërsa Trepça mbeti pa qindra mijëra euro të hyra vjetore.
Në qeverisjen e kaluar patëm ndarë mbi shtatë milionë euro për Trepçën – mbi 3.5 milionë për rimëkëmbje, në njërën anë, dhe po aq për paga e investime kapitale.
Me projektin tonë për Fondin Sovran, “Trepçën” e kemi vendosur në qendër të zhvillimit të ardhshëm ekonomik. Për ndërmarrjet publike, përfshirë edhe Trepçën, në buxhetin e vitit 2022 kemi ndarë 40 milionë euro.
Rikthimi i terminalit doganor në Trepçë është hapi i parë i përmbushjes së zotimit tonë që deri në mesin e vitit të ardhshëm, terminalet doganore shtetërore të shtrihen në gjithë vendin.
