Zëvendëskryeministri i Kosovës, Besnik Bislimi nga Varshava e Polonisë ka folur për zgjedhjet e 9 shkurtit në Kosovë. Para takimit me ministrat për çështje evropiane në Varshavë, organizuar nga Presidenca e Polonisë e Këshillit të BE-së, Bislimi ka bërë të ditur se do të diskutojnë edhe për “kërcënimet e sigurisë sa i përket sulmeve në faqen e KQZ-së”.
Ai tha se kishte një frekuencë të sofistikuar dhe intensive të shpërndarjes të informacionit të rremë.
“Ne patëm zgjedhje në Kosovë javën e kaluar dhe e përjetuam drejtpërdrejtë këtë formë të kërcënimeve të sigurisë për sa i përket sulmeve në faqen e internetit të Komisionit Qendror të Zgjedhjeve, por edhe në një frekuencë shumë të sofistikuar dhe intensive të shpërndarjes dhe prodhimit të informacioneve të rreme, shumë të sofistikuara për sa i përket çështjeve dhe kohës së përzgjedhur”, ka thënë Bislimi.
“Vendet tona mund të ndryshojnë në frekuencën dhe intensitetin e këtyre kërcënimeve për ne e kemi të gjithë të përbashkët praninë e tyre dhe prandaj është zgjedhja e duhur që tëdiskutojmë përgjigjen e mundshme ndaj këtyre kërcënimeve të sigurisë”, tha Bislimi.
