Çudira në Vushtrri – Pllakat e sheshit të ri vendosen me dhe ndërmjet, duke krijuar terren për bar

Projekti për ndërtimin e sheshit të ri në qytetin e Vushtrrisë po ngre pikëpyetje serioze për cilësinë dhe profesionalizmin e punimeve që po kryhen, shkruan Mitropol.

Fotot e siguruara nga Mitropol tregojnë një situatë jo të zakontë në zonën ku po vendosen pllakat e betonit. Ato janë vendosur me një distancë prej rreth 6 centimetrash nga njëra-tjetra, hapësira këto që po mbushen me dhé, duke krijuar kështu kushte ideale për mbirjen e barit dhe jo për një sipërfaqe urbane të qëndrueshme.

Sipas pamjeve, në pjesën e poshtme të pllakave është vendosur një shtresë guralecësh, që supozohet se janë për të parandaluar mbirjen e barit. Megjithatë, fakti që hapësirat ndërmjet pllakave mbushen me dhe e bën këtë përpjekje të kotë, pasi dheu sipërfaqësor është një substrat i përsosur për bimësi.

Ky projekt, që duhet të përfaqësojë një investim në përmirësimin e infrastrukturës urbane dhe bukurinë estetike të qytetit, për momentin duket më shumë si një shembull i keqmenaxhimit teknik. Banorët kanë nisur të shprehin pakënaqësi për mënyrën se si po realizohet ky shesh, ndërsa mungesa e transparencës dhe mbikëqyrjes profesionale shton dyshimet për efektshmërinë e këtij investimi publik.

Mbetet të shihet nëse autoritetet komunale do të japin një shpjegim për këtë mënyrë të pazakontë ndërtimi dhe nëse do të ndërmarrin masa për të përmirësuar standardin e punimeve në këtë projekt të rëndësishëm për qytetin./Mitropol/