Detaje nga rrëmbimi i 64-vjeçarit në Prishtinë, një person dyshohet se e mbajti në mal disa orë
Denoncimi i një rasti të rrëmbimit në Prishtinë ka aktivizuar Policinë mbrëmjen e së hënës, për të marrë informacione dhe për ta gjetur personin që dyshohej se ishte kidnapuar. Detajet e rastit u zbuluan pasi viktima u paraqit vet në stacion policor, teksa tashmë është iniciuar hetim për zbardhjen e ngjarjes.
Siç merr vesh Sinjali, bëhet fjalë për një 64-vjeçar, i cili dyshohet se është rrëmbyer gjatë ditës së djeshme nga një person, për motive akoma të panjohura.
Në bazë të informacioneve të para, rasti është raportuar nga një qytetar, i cili ka deklaruar se miku i tij – viktima, është rrëmbyer dhe është dërguar në një mal, afër Prishtinës.
Posa Policia është njoftuar për rastin, janë ndërmarrë veprimet e nevojshme, por që viktima nuk është hasur, derisa i njëjti shkoi vet në stacion dhe dha deklaratën e tij.
Lidhur me rastin, është vënë në dijeni edhe Prokurori i Shtetit, i cili ka urdhëruar inicimin e hetimit në drejtim të veprës penale “Rrëmbimi” dhe identifikimin e personit të dyshuar.
