E frikshme: Pacientët mitrovicas me koronavirus trajtohen në ambiente me myk e plot mbeturina, Bahtiri pa zë
Gjendja e hapësirave ku po trajtohen pacientët mitrovicas të prekur nga koronavirusi është e frikshme. Këto ambiente janë të mbushura me myk nëpër mure jashtëzakonisht johigjienike, shkruan Mitropol.
Pacientët i thanë Mitropol se po ndjehen të shqetësuar se do marrin ndonjë sëmundje tjetër për shkak të papastërtisë që mbretëron aty.
“Veç m’u sëmurë e me vdekë prej të flliqtit, se korona ndoshta na kalon diqysh”, thotë njëri nga pacientët për Mitropol.
Nga Drejtoria e Shëndetësisë nuk kanë dhënë asnjë sqarim se pse këta pacientë janë vendosur në këto hapësira të tmerrshme për nga kushtet higjienike.
Gjendje edhe më e tmerrshme mbretëron në dhomën anash dhomës ku këta pacientë po trajtohen. Ajo dhomë tashmë duket si të ishte deponi mbeturinash.
Për gjendjen e repartit të shëndetësisë tash e 8 vite, kryetari i Komunës, Agim Bahtiri nuk ka marrë asnjë përgjegjësi. Ai madje kishte premtuar rrënimin e këtij objekti dhe ndërtimin e një objekti të ri, mirëpo edhe kjo ishte veç një mashtrim elektoral për qytetarët e Mitrovicës./Mitropol/
