Pesë persona janë ndaluar gjatë ditës së djeshme nga Prokuroria Themelore në Mitrovicë, në dy raste të ndara, nën dyshimin për “cenim të përcaktimit të lirë të votuesve”. Në mesin e tyre është edhe një burrë, i cili u prangos në fshatin Gracë të Vushtrrisë, mëngjesin e 9 shkurtit.
Bazuar në informacionet e para, i dyshuari e ka fotografuar fletëvotimin e tij dhe përmes telefonit, ia ka dërguar foton djalit të tij, që ndodhet në Serbi.
Sinjali ka mësuar se personi i arrestuar është i nacionalitetit serb dhe bëhet fjalë për Rade Vukmirovic.
Vukmirovic është shoqëruar në stacion policor, ndërsa telefoni i është sekuestruar si provë materiale lidhur me rastin.
Ndaj tij, Prokurori i Shtetit ka urdhëruar masën e ndalimit policor dhe ndërmarrjen e veprimeve të nevojshme brenda afatit ligjor.
Shënim: Personi i apostrofuar në këtë artikull prezumohen i pafajshëm derisa fajësia e tij të mos provohet me vendim të formës së prerë nga gjykata.
