“Nuk duhen para e as pushtet” – Ymeri inkurajon të rinjtë që aspirojnë të përfshihen në politikë
Deputetja e zgjedhur e Lidhjes Demokratike, Janina Ymeri, ka përcjellë një mesazh të fuqishëm shprese për të gjithë të rinjtë që aspirojnë të përfshihen në politikë, duke sfiduar perceptimet e vjetra mbi mënyrën se si arrihet suksesi politik në Kosovë.
Gjatë një paraqitjeje sot në emisionin “Pressing” në T7, Ymeri hodhi poshtë çfarëdo mendimi se për t’u bërë deputet nevojitet një stazh i gjatë partiak, fuqi financiare apo mbështetje familjare nga njerëz me pushtet. Ajo theksoi se meritokracia dhe puna e vazhdueshme janë rrugë të hapura për këdo.
“Nuk ka nevojë me nejtë 20 vjet në një parti dhe me dalë deputet; nuk ka nevojë me pasë para; nuk ka nevojë me pasë pushtet; nuk ka nevojë me i pasë prindë kushedi se çka në pushtet për me u ngritë si deputet,” deklaroi Ymeri.
Duke folur për rrugëtimin e saj personal, deputetja e re sqaroi se ekspozimi i saj publik nuk ishte rezultat i ndonjë favorizimi brenda strukturave partiake, por i angazhimit të saj të drejtpërdrejtë.
“Ka shumë njerëz që kanë mendu që në media kam shku nga partia dhe që ndoshta aktivistët tjerë kanë mbetë anash. Kjo s’është e vërtetë, se nuk janë bërë kësi lloj dallime. Jam thirrur nga mediat veçmas, pa një etiketë mbrapa – as partisë, as parasë, asnjë lloji tjetër,” shtoi ajo.
Ymeri shtoi se çelësi i suksesit të saj ishte konsistenca në reagime dhe komunikim me publikun, duke dëshmuar se nuk ekziston një prototip i paracaktuar për të qenë i suksesshëm në politikë.
“Krejt çka unë kam bërë është në shifra të sakta, aq sa unë jam mundu: me postu dhe me reagu pa ndalim. Ka shpresë dhe nuk është prototipi nëse ke, bëhesh. Edhe nëse s’ke, bëhesh,” përfundoi ajo.
