PDK-ja drejt Gjykatës Supreme – Arian Tahiri kundër vendimit të PZAP-së për zgjedhjet në Mitrovicë: ‘Drejtësia do të vijë’

Mitrovica po hyn në një tjetër kapitull të debatit politik rreth procesit zgjedhor, pasi Partia Demokratike e Kosovës ka reaguar ashpër ndaj vendimit të Panelit Zgjedhor për Ankesa dhe Parashtresa (PZAP), i cili sot ka refuzuar ankesën e këtij subjekti për zgjedhjet lokale në Mitrovicën e Jugut, ahkruan Mitropol.

Kandidati i PDK-së për kryetar të komunës, Arian Tahiri, pati një reagim të fortë, duke e cilësuar vendimin si të padrejtë dhe të shkëputur nga realiteti që, sipas tij, është përjetuar gjatë ditës së votimit.

Në reagimin e tij publik, Tahiri nënvizoi se PDK ka dorëzuar para PZAP-it një dosje të plotë me prova, dëshmi dhe situata të dokumentuara që, sipas tyre, vërtetojnë se procesi zgjedhor është cenuar në mënyrë të drejtpërdrejtë.

“Vullneti i qytetarëve nuk është respektuar ashtu siç e kërkon ligji dhe standardet demokratike”, theksoi ai, duke shtuar se partia që përfaqëson nuk po kërkon asgjë më shumë sesa mbrojtjen e votës së lirë.

Vendimi i PZAP-së, i bërë publik sot, e refuzoi si “të pabazuar” kërkesën për rivotim në Mitrovicën e Jugut, duke theksuar se pretendimet e PDK-së nuk qëndrojnë në nivelin juridik e procedural që kërkon ligji. Paneli hodhi poshtë edhe pretendimin e shumëpërfolur për ashtuquajturin “tren bullgar”, duke theksuar se një akuzë e tillë nuk është mbështetur me fakte të mjaftueshme gjatë shqyrtimit të ankesës.

Mirëpo, ky vendim nuk e ka ndalur aspak PDK-në. Përkundrazi, siç theksoi Arian Tahiri, hapi i radhës do të jetë adresimi i çështjes në Gjykatën Supreme të Republikës së Kosovës – instanca e fundit dhe vendimtare që mund të japë dritën jeshile për një rivlerësim të të gjithë procesit.
“Ne nuk do të ndalemi. Do t’i përdorim të gjitha mekanizmat ligjorë që na takojnë si subjekt politik në një demokraci funksionale. Drejtësia do të vijë, dhe ne do të vazhdojmë deri në fund”, deklaroi ai me tone të ashpra, duke sinjalizuar vazhdimin e betejës politike e juridike.

Në Mitrovicë, reagimi i sotëm pritet të nxisë diskutime të reja rreth transparencës së zgjedhjeve, profesionalizmit të institucioneve zgjedhore dhe besimit të qytetarëve në procesin demokratik. Përkrahësit e Tahirit e shohin këtë lëvizje si të domosdoshme për të garantuar integritetin e votës, ndërsa oponentët politikë e konsiderojnë si tentativë për të zgjatur procesin dhe për të krijuar tensione të panevojshme.

Megjithatë, një gjë mbetet e qartë, beteja zgjedhore në Mitrovicë nuk ka përfunduar ende. Me PDK-në që tashmë po drejtohet drejt Gjykatës Supreme, pritet që ditët në vijim të sjellin zhvillime të reja dhe një tjetër valë reagimesh politike. Deri atëherë, qytetarët e Mitrovicës mbeten në pritje të epilogut të një procesi që, për shumë kënd, ka qenë më i ngarkuar se kurrë më parë.

Në qendër të gjithë kësaj mbetet vota, ajo e qytetarëve, e cila sipas PDK-së duhet mbrojtur me çdo mjet ligjor. Dhe ndërsa palët presin vendimin e radhës, një atmosferë e tensionuar politike po përshkruan sërish Mitrovicën, duke rikthyer pyetjen se sa i qëndrueshëm është sistemi zgjedhor dhe sa gati janë institucionet për t’u përballur me kontestime të tilla.

Arian Tahiri, ndërkohë, e mbylli reagimin e tij me një mesazh të qartë e të drejtpërdrejtë: “Drejtësia do të vijë. Ne do të vazhdojmë deri në fund.”/Mitropol/