Policia e Kosovës ka ndaluar një automjet në fshatin Jellak të Leposaviqit, ku dyshohet se shoferi kishte hyrë ilegalisht nga territori i Serbisë në Republikën e Kosovës, njofton “Mitropol”.
Ngjarja ka ndodhur rreth orës 22:00 gjatë patrullimit rutinë të policisë. Automjeti me targa lokale u ndalua nga autoritetet, dhe gjatë kontrollit të mjetit dhe shoferit, u zbulua dhe u sekuestrua një radiolidhje që i përkiste të dyshuarit, një shtetas kosovar.
I dyshuari është arrestuar menjëherë dhe është intervistuar nga organet hetimore. Pas përfundimit të procedurave fillestare, prokurori i çështjes ka vendosur që ai të lirohet në procedurë të rregullt, ndërkohë që hetimet mbi rastin do të vazhdojnë.
Kalimet e paautorizuara të kufirit mbeten një sfidë për organet e sigurisë, veçanërisht në rajonet kufitare ku rreziku i aktiviteteve të paligjshme është i lartë. Policia ka bërë thirrje për vigjilencë dhe bashkëpunim nga qytetarët për të raportuar çdo aktivitet të dyshimtë që mund të cënojë sigurinë e vendit.
Autoritetet theksojnë se çdo tentativë për të shkelur ligjin për kufijtë do të trajtohet me seriozitet dhe sipas dispozitave ligjore në fuqi./Mitropol/
