Një person është arrestuar nga Policia e Kosovës, pasi që dyshohet se e ka kanosur dhëndrin e tij, të cilin ka tentuar ta therë me thikë, raporton Gazeta Sinjali.
Si filloi e gjitha?
Një burrë nuk e kishte gjetur gruan e tij kur ishte kthyer në shtëpi mbrëmjen e së shtunës, rreth orës 22:30. Pasi ishte njoftuar nga ajo përmes telefonit që ndodhet të prindërit e saj, ishte nisur për në rrugën “Naim Delvina”, në Prishtinë.
Me të mbërritur aty, miku i tij, vëllai i gruas, kishte dalë me një thikë në dorë, duke tentuar që ta godas.
Ai nuk e kishte lënë me kaq, sipas dëshmisë së burrit të siguruar nga Gazeta Sinjali, miku ka hipur në veturën e tij me të cilën e ka ndjekur dhëndrin për ta therur me thikë.
Çka deklaroi miku para hetuesve?
I dyshuari për “Kanosje” e ka pranuar se ishte ai që ia hapi derën dhëndrit, por e mohon që ka pasur thikë në dorë.
Ai po ashtu nuk e ka fshehur që e ka ndjekur me veturë burrin e motrës së tij, por ka deklaruar se ata nuk kanë pasur asnjë kontakt fizik.
Pas intervistimit, Sinjali mëson se prokurori ka dhënë urdhër që ndaj tij të hapet rasti “Kanosje”.
