Rasti tragjik në Gjakovë: Këta janë tre fëmijët që u gjetën të vdekur, trupat u dërgohen në morg

Një ngjarje e rëndë ka ndodhur mbrëmjen e të premtes në fshatin Jabllanicë në Gjakovë, ku tre fëmijë kanë humbur jetën si pasojë e shembjes së një shtëpie të pabanuar.

Sipas informacioneve të para, tragjedia ka ndodhur pas rrëzimit të pllakës së një shtëpie të pabanuar.

Sinjali ka raportuar se fëmijët janë të moshave 13 dhe 15-vjeçare, nga familjet Ramaj, Morina dhe Mehmetaj.

Vdekjen e të miturve e kanë konstatuar ekipet mjekësore në vendin e ngjarjes, ndërsa drejtori i Spitalit Rajonal të Gjakovës, Hilmi Shala, ka bërë të ditur se trupat e pajetë të viktimave janë dërguar në morgun e spitalit.

Në vendin e ngjarjes, përveç njësiteve policore dhe ambulancës, kanë dalë edhe zjarrfikësit, të cilët kanë intervenuar në lidhje me rastin.

Lajmin e kanë konfirmuar edhe nga Policia e Kosovës.

Sipas informacioneve që ka Sinjali, fëmijët që vdiqën tragjikisht janë Ideal Ramaj, Rame Mehmetaj dhe Veton Morina, rreth 13 dhe 15-vjeçarë.