Vushtrriasi i dyshuar për të shtënat me armë në Bivolak paraqitet në Polici dhe dorëzon armën

Pas incidentit të raportuar në Mitropol më 30 dhjetor, ku në Bivolak të Vushtrrisë një 38-vjeçar dyshohej se kishte shtënë disa herë me armë zjarri në rrethana të lidhura me një konflikt të mëhershëm, sot ka ardhur zhvillimi i parë i drejtpërdrejtë nga Policia.

Sipas raportit shtesë të dorëzuar nga Policia e Kosovës, i dyshuari, që ishte raportuar se është Faton Saraqi, është paraqitur vetë në stacionin policor në Vushtrri, njofton Mitropol.

Ai ka dorëzuar një armë zjarri, si dhe një karikator me shtatë fishekë, të cilat dyshohet të jenë në lidhje me rastin e të shtënave të ndodhura më 28.11.2025 rreth orës 22:00 në fshat.

Dorëzimi vullnetar dhe paraqitja e tij në Polici shënojnë zhvillimin e parë konkret që nga momenti kur shtëpia e tij ishte bastisur dhe nga ku ishin sekuestruar 14 fishekë 9mm, ndërsa ai vetë nuk ishte hasur në vendngjarje. Në atë kohë, Saraqi dyshohej se kishte qëlluar 3–4 herë “për ta frikësuar” një 23-vjeçar, i cili e kishte raportuar rastin vetëm një ditë më pas nga frika.

Policia konfirmon se pas dorëzimit të armës, i dyshuari është arrestuar, intervistuar, dhe me vendim të Prokurorit është dërguar në mbajtje. Ndërkohë, procedura penale ndaj tij po vazhdon nën dyshimin për “Mbajtje në pronësi, kontroll apo posedim të paautorizuar të armës” dhe “Përdorim të armës apo mjetit të rrezikshëm”.

Hetimet janë ende në vazhdim, ndërsa Policia pritet të sqarojë në ditët në vijim nëse arma e dorëzuar lidhet drejtpërdrejt me të shtënat e natës së incidentit. Mitropol do të raportojë për çdo zhvillim të ri.