Një ditë e rëndë për rajonin e Mitrovicës është shënuar më 5 maj 2026, ku brenda pak orësh janë raportuar tri raste të ndara të personave të gjetur pa shenja jete, në Mitrovicë të Jugut, Leposaviq dhe Zveçan. Autoritetet policore kanë nisur hetimet për secilin rast, ndërsa trupat e pajetë janë dërguar për obduksion në Institutin e Mjekësisë Ligjore, njofton Mitropol.
Rasti i parë është regjistruar në Mitrovicë të Jugut, ku një burrë është gjetur pa shenja jete. Në vendin e ngjarjes kanë dalë ekipet përkatëse, ndërsa mjeku kujdestar ka konstatuar vdekjen. Me urdhër të prokurorit, trupi i pajetë është dërguar në IML për obduksion, ndërsa rasti është cilësuar si “Hetim mbi vdekjen” dhe po trajtohet nga organet kompetente.
Ndërkohë, në Leposaviq, rreth orës 09:30, një tjetër burrë është gjetur pa shenja jete brenda shtëpisë së tij. Edhe në këtë rast, mjeku kujdestar ka konstatuar vdekjen në vendin e ngjarjes. Me vendim të prokurorit, trupi është dërguar për obduksion në IML, ndërsa rasti është hapur si “Vdekje e dyshuar” dhe po hetohet nga ekipet relevante.
Pak më vonë, rreth orës 11:00, një rast i tretë është raportuar në Zveçan. Pas pranimit të informacionit për një person pa shenja jete, në vendin e ngjarjes kanë dalë njësitë policore dhe ekipi mjekësor, të cilët kanë konstatuar vdekjen e një burri. Edhe në këtë rast, me urdhër të prokurorit, trupi i pajetë është dërguar në Institutin e Mjekësisë Ligjore për obduksion.
Dy rastet nga Mitrovica dhe Leposaviqi mbeten nën hetim, ndërsa autoritetet nuk kanë dhënë ende detaje shtesë lidhur me rrethanat apo shkaqet e vdekjeve./Mitropol/
