Një aksion policor i realizuar mbrëmjen e së martës, më 5 maj 2026, në Mitrovicë ka rezultuar me arrestimin e një personi të dyshuar për përfshirje në veprimtari të paligjshme që ndërlidhen me substanca narkotike, njofton Mitropol.
Sipas informacioneve zyrtare, rreth orës 19:15, njësitet policore kanë ndaluar një burrë të dyshuar, tek i cili gjatë kontrollit fillestar janë gjetur dhe konfiskuar katër qese me substancë të dyshuar narkotike të llojit marihuanë, me peshë prej 8.4 gramësh.
Hetimet kanë vazhduar më tej në koordinim me prokurorin e rastit, ku është realizuar edhe bastisja e banesës së të dyshuarit. Gjatë kontrollit të shtëpisë, policia ka gjetur dhe sekuestruar edhe 52 gramë të tjera substancë të dyshuar narkotike, duke e çuar sasinë totale në 60.4 gramë.
Po ashtu, në vendin e ngjarjes janë konfiskuar katër peshore digjitale, një telefon celular si dhe tre komplete qese plastike që dyshohet se janë përdorur për paketimin dhe shpërndarjen e substancave narkotike.
Pas përfundimit të procedurave fillestare dhe me vendim të prokurorit kompetent, i dyshuari është dërguar në mbajtje, ndërsa rasti është iniciuar si “Blerja, posedimi, shpërndarja dhe shitja e paautorizuar e substancave narkotike”.
Autoritetet kanë bërë të ditur se hetimet janë duke vazhduar për të zbardhur plotësisht rrethanat e këtij rasti./Mitropol/
