Arrestohet i dyshuari në Skenderaj, rrahu një person e bëri për spital, i konfiskohet edhe një armë me gaz

Policia e Kosovës në Skenderaj ka arrestuar sot një person të dyshuar, i cili dyshohet për përfshirje në veprat penale “Lëndim i rëndë trupor” dhe “Armëmbajtje pa leje”, pas një incidenti që ka ndodhur rreth orës 11:30, njofton Mitropol.

Sipas njoftimit zyrtar të policisë, rasti ka ndodhur pas një mosmarrëveshjeje mes palëve, e cila më pas ka eskaluar në dhunë fizike. Në rrethana ende të sqaruara plotësisht nga hetuesit, i dyshuari ka sulmuar fizikisht viktimën, i cili gjithashtu është mashkull.

Si pasojë e sulmit, viktima ka pësuar lëndime trupore dhe është dërguar menjëherë për tretman mjekësor.

Gjatë ndërhyrjes policore dhe veprimeve në vendin e ngjarjes, nga i dyshuari është sekuestruar një armë e llojit pistoletë me gas, e cila është gjetur së bashku me gjashtë fishekë. Po ashtu, në vendngjarje është evidentuar edhe një gëzhojë arme, e cila pritet të jetë pjesë e ekzaminimeve balistike dhe hetimore për të sqaruar më tej rrethanat e përdorimit të saj.

Policia ka bërë të ditur se pas përfundimit të procedurave të nevojshme të intervistimit, ndaj të dyshuarit është marrë vendim nga prokurori kompetent për caktimin e masës së ndalimit policor. Ai aktualisht po mbahet në ndalim në përputhje me procedurat ligjore në fuqi, ndërsa rasti po vazhdon të hetohet.

Hetuesit policorë, në bashkëpunim me prokurorinë, janë duke punuar për të sqaruar motivet e sakta të incidentit, si dhe për të mbledhur të gjitha provat materiale dhe dëshmitë që lidhen me ngjarjen.

Rasti është klasifikuar si lëndim i rëndë trupor dhe armëmbajtje pa leje, ndërsa autoritetet kanë theksuar se veprimet e mëtejshme do të ndërmerren në varësi të zhvillimit të hetimeve./Mitropol/