KFOR konfirmon për “Mitropol” se ka nisur largimin gradual nga Ura e Ibrit, nuk konfirmon se Policia e Kosovës ka marrë përgjegjësinë e plotë për sigurinë

Misioni i NATO-s në Kosovë, KFOR, ka nisur një proces gradual të ndryshimit të pranisë së tij të përhershme në Urën Kryesore të Ibrit në Mitrovicë, duke e lidhur këtë hap me përmirësimin e situatës së sigurisë në Kosovë, njofton Mitropol.

KFOR-i e ka bërë të ditur këtë për Mitropol, pas një kërkese për sqarim lidhur me një pretendim të transmetuesit publik RTK, sipas të cilit Policia e Kosovës do të ishte përgjegjëse për sigurinë e Urës së Ibrit “për herë të parë pas 27 vitesh”.

Në përgjigjen e KFOR-it nuk konfirmohet se Policia e Kosovës ka marrë përgjegjësinë për sigurinë e urës. Në vend të kësaj, KFOR-i thotë se ka nisur “tranzicionin gradual të pranisë së përhershme të KFOR-it” nga Ura Kryesore në Mitrovicë.

Sipas KFOR-it, ky proces është pjesë e optimizimit të pozicionimit të misionit dhe do të zhvillohet në mënyrë graduale dhe të bazuar në kushtet e sigurisë.

“Ky proces do të jetë gradual, i bazuar në kushte dhe po koordinohet ngushtë me të gjithë akterët relevantë”, thuhet në përgjigjen e KFOR-it.

KFOR-i thekson se në këtë proces janë të përfshira institucionet e Kosovës, organizatat ndërkombëtare, Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX).

Gjithashtu, sipas KFOR-it, Shefi i Shtabit të Përgjithshëm të Forcave të Armatosura të Serbisë, gjenerali Milan Mojsilović, është informuar rregullisht për këtë proces.

Komandanti i KFOR-it, gjeneralmajor Özkan Ulutaş, sipas misionit të NATO-s, vazhdon të jetë në kontakt të ngushtë me institucionet e Kosovës, organizatat ndërkombëtare dhe Forcat e Armatosura të Serbisë.

Megjithatë, KFOR-i sqaron se largimi gradual i pranisë së përhershme nga ura nuk nënkupton largimin e tij nga veriu i Kosovës.

“KFOR-i do të mbajë një prani të dukshme në Mitrovicën e Jugut dhe të Veriut, si dhe në veriun e Kosovës”, thuhet në përgjigje.

Misioni i NATO-s thekson se personeli i tij është i pozicionuar në mënyrë që të mund të reagojë ndaj zhvillimeve relevante dhe se do të vazhdojë të kontribuojë në krijimin e një mjedisi të sigurt dhe të qetë për të gjitha komunitetet.

KFOR-i rikujton se mandati i tij bazohet në Rezolutën 1244 të Këshillit të Sigurimit të Kombeve të Bashkuara të vitit 1999 dhe se vazhdon të jetë përgjegjës për kontributin në ruajtjen e një mjedisi të sigurt dhe lirinë e lëvizjes në Kosovë.

Në këtë kuadër, KFOR-i thotë se vepron në mënyrë të paanshme dhe në koordinim të ngushtë me Policinë e Kosovës dhe EULEX-in, secili brenda rolit të vet si reagues në fushën e sigurisë.

Pra, përgjigjja e KFOR-it konfirmon nisjen e një procesi të largimit gradual të pranisë së përhershme të KFOR-it nga Ura e Ibrit, por nuk konfirmon pretendimin se Policia e Kosovës ka marrë tashmë përgjegjësinë për sigurinë e urës apo se kjo ka ndodhur “për herë të parë pas 27 vitesh”.