Sulmohen policët që intervenuan në një rast të dhunës në familje në Vushtrri, zbulohet emri i të dyshuarit
Nuk janë të rralla rastet kur zyrtarët policorë ballafaqohen me kërcënime serioze që eskalojnë edhe në sulme fizike ndaj tyre, duke ua vështirësuar punën e madje duke ua kërcënuar edhe jetën. Kështu ka ndodhur së fundmi në Vushtrri, ku Policia po intervenonte në një rast të dhunës në familje.
Personi i dyshuari u denoncua fillimisht nga familjarët për dhunë dhe kërcënime me vrasje
Sinjali ka mësuar se si rezultat i denoncimit, Policia doli në vendin e ngjarjes, por aty u përballën me të dyshuarin, i cili e sulmoi njërin nga zyrtarët policorë, e më pas vazhdoi me kanosje.
Burimet brenda Prokurorisë kanë bërë me dije se personi që po dyshohet për këtë rast është Albion Sokoli.
Sokoli po dyshohet se ka vazhduar me sjellje agresive edhe pasi është prangosur, duke i shkaktuar lëndime trupore një polici tjetër.
Për pasojë, dy zyrtarët e Policisë kanë marrë trajtim mjekësor.
Ndaj të dyshuarit, Prokurori i Shtetit ka urdhëruar masën e ndalimit policor dhe inicimin e hetimit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
