KOSOVËLAJME

Tre të plagosur me armë zjarri, njëri me thikë: Krejt çka ndodhi mbrëmë në Lupç, pas një mosmarrëveshje mes disa familjarëve

Katër persona kanë mbetur të plagosur të mërkurën në orët e pasdites në Lupç të Podujevës. Tre prej tyre janë plagosur me armë zjarri, ndërsa njëri me thikë. Prokuroria ka bërë të ditur se ngjarja ka ndodhur pas një mosmarrëveshje mes disa personave që janë familjarë. Tashmë, pesë persona janë ndaluar për 48 orë, ndërsa rasti është cilësuar si tentim vrasje.

“ Rreth orës 16:00 si pasojë e të shtënave me armë zjarri në Lupç të Podujevës janë plagosur tre persona, ndërsa një person tjetër ka pësuar lëndime nga thika”.

Florenti Company
Market Florenti
Koha

Këtë fillimisht e konfirmoi zëdhënësja e Policisë së Kosovës për Rajonin e Prishtinës, Flora Ahmeti.

“Rreth orës 16:00 kemi marrë informatën për të shtëna me armë zjarri në fshatin Lupç të Podujevës. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme. Bazuar në të dhënat e deritanishme në këtë rast janë plagosur nga arma e zjarrit tre persona, ndërsa një person ka pësuar lëndime nga arma e ftohtë (thikë). Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit”, ka thënë Ahmeti për Express.

Të katërtit janë dërguar në Klinikën Emergjente të QKUK, ku kanë qëndruar patrulla të shumta të Policisë.

Lidhur me gjendjen shëndetësore të të plagosurve kanë folur nga Qendra Emergjente në QKUK.

“Një 50 vjeçar, që është në mesin e katër të plagosurve me armë zjarri në Lupç të Podujevë, është në rrezik për jetë”, ka thënë mjeku kujdestar në Klinikën Emergjente në QKUK, Agron Çitaku.

Çitaku tha se njëri person i plagosur, i moshës rreth 50 vjeçare, është në gjendje më të rëndë dhe pritet të operohet.

“Kanë mbërri katër raste. Trajtimi ka zgjatur deri tani. Dy prej tyre janë në gjendje më të rëndë, dy më të lehtë. Ata mund të lëshohen. Ata kanë plagë shpuese dhe trajtimi është duke vazhduar. Njëri do të futet në sallë të operimit. Për momentin njëri prej tyre mund të themi se është në rrezik për jetë. Të tjerët jo”, ka deklaruar Çitaku.

Ndërkaq, zëdhënësja e Prokurorisë, Laureta Ulaj, ka thënë për Express se nga hetimet fillestare dyshohet se ngjarja ka ndodhur një mosmarrëveshje mes disa familjarëve. Ajo shtoi se një person është shoqëruar në stacion policor për t’u intervistuar.

“Pas pranimit të informatës nga policia, prokurori kujdestar nga Departamenti i Krimeve të Rënda, ka dalë në vendngjarje. Nga hetimet fillestare dyshohet se pas një mosmarrëveshje mes disa personave (familjarë), në fshatin Lupç, si pasojë e të shtënave me armë zjarri dhe përdorimit të thikës, janë lënduar katër (4) persona, të cilët janë dërguar për ta marrë trajtimin e nevojshëm mjekësor, derisa një (1) person i dyshuar në këtë ngjarje është shoqëruar në stacion policor për tu intervistuar. Prokurori i Shtetit në koordinim me policinë janë duke i ndërmarrë veprimet hetimore në drejtim të veprës penale “Vrasja në tentativë”, me qëllim të sqarimit të rrethanave të këtij rasti”, tha Ulaj për Express.

Pas trajtimit mjekësor që mori në Emergjencë, një nga të lënduarit është arrestuar, ndërkaq më vonë Policia bëri të ditur se pesë personave u është caktuar masa e ndalimit për 48 orë.

“Deri tani, nga ana e prokurorit të shtetit, masë e ndalimit (48 orë) është shqiptuar për pesë persona të dyshuar dhe rasti është cilësuar si vrasje në tentativë”, tha zëdhënësja e Policisë, Flora Ahmeti për Express.

Prokuroria e Prishtinës më pas ka dalë me një detaje shtesë. Zëdhënësja e Prokuroria në Prishtinë, Laureta Ulaj, ka thënë për Express se personat e dyshuar që janë duke u trajtuar në QKUK janë nën masën e sigurisë nga Policia.

“Prokurori i Shtetit ka lëshuar aktvendim mbi ndalimin e pesë (5) personave të dyshuar në këtë rast, për shkak të veprës penale “Vrasja në tentativë”. Personat e dyshuar të cilët janë duke u trajtuar në QKUK janë nën masën e sigurisë nga policia”, tha Ulaj.