Vazhdon tmerri nga paratë false, ‘ProCredit’ raporton se shtatë kompani deponuan monedha të falsifikuara

Trendi i parave të falsifikuara ka ‘lulëzuar’ në Kosovë për një kohë të gjatë, ku qindra e mijëra euro false janë vënë përditë në qarkullim. Rastet e tilla raportohen kryesisht nga zyrtarët e bankave në vend, teksa monedhat metalike që më së shumti dalin false janë 1 dhe 2 euro, si dhe kartëmonedhat 50 e 100 euro.

Disa raste të ndryshme janë denoncuar së fundmi nga një zyrtar i bankës ‘ProCredit Bank’, i cili ka raportuar për deponimin e parave të dyshuara false nga disa kompani në Prishtinë.

Sinjali mëson se bëhet fjalë për një shumë jo fort të vogël, para këto që sipas informacioneve të para janë deponuar brenda nëntë ditëve.

Si rezultat i denoncimit, monedhat janë konfiskuar dhe me urdhër të Prokurorit të Shtetit, është iniciuar rasti ‘Falsifikim i parasë’.

Ndryshe, falsifikimi i parasë është vepër penale dhe sanksionohet sipas Kodit Penal të Republikës së Kosovës.