Rreth orës 17:00 si pasojë e një aksidenti trafiku në Kçiq të Mitrovicës kanë pësuar lëndime 6 persona, shkruan Mitropol.
Informacionin e ka konfirmuar për “Mitropol” zëdhënësi i spitalit rajonal të Mitrovicës, Shpend Fazliu.
Siç tha Fazliu për “Mitropol”, nga 6 të lënduarit një fëmijë 9 vjeçar si shkak i gjendjes më të rënduar është transferuar për trajtim të mëtejmë në QKUK.
“Për 5 të lënduarit tjerë po kryhen ekzaminimet diagnostike dhe trajtimet tjera të nevojshme nga stafi i Emergjencës.”, tha Fazliu.
Rasti është konfirmuar edhe nga zëdhënësi i policisë për Mitrovicën e jugut, Avni Zahiti.
“Rreth orës 16:30, në rrugën nacionale Mitrovicë–Prishtinë, në segmentin rrugor në fshatin Kçiq, ka ndodhur një aksident trafiku me lëndime.
Në aksident janë përfshirë dy vetura, ku si pasojë e aksidentit lëndime trupore kanë pësuar katër persona.
Të lënduarit janë dërguar për trajtim mjekësor, ndërsa njësitet përkatëse policore kanë dalë në vendin e ngjarjes dhe po hetojnë rrethanat e aksidentit.”, tha Zahiti.
