Albanian Post: Është arritur pajtim për liberalizimin e vizave për Kosovën – “punë e kryer”
Përkundër informacioneve se është zyrtarizuar kërkesa e Francës që hyrja në fuqi e një vendimi eventual për liberalizimin e vizave për Kosovën, të kushtëzohet me fuqizimin e Sistemit Evropian të Informimit dhe Autorizimit të Udhëtimit (ETIAS), Albanian Post ka mësuar nga burimet se çështja e vizave për Kosovën tashmë është punë e kryer.
Janë vendosur edhe nënshkrimet dhe Kosovës do t’i liberalizohen vizat shumë shpejt, pasi është arritur edhe pajtim mes Brukselit dhe Kosovës.
Burimet thonë për AP se Brukseli zyrtar ka marrë pëlqimin e të gjitha ministrive të shteteve anëtare dhe Këshilli i Ministrave do të vendosë pozitivisht për këtë çështje.
Në bisedimet e radhës me 9 dhe 10 nëntor, në takimin e grupit punues për vizat në Këshillin e BE-së do të bëhet e qartë gjithçka.
Historik i rrugëtimit të Kosovës drejt Liberalizimit të Vizave
Kosova e ka nisur rrugëtimin e saj drejt liberalizimit para 12 viteve. Premtimet e shpeshta të politikanëve kosovarë se liberalizimi i vizave do të ndodhte “shumë shpejt”, gazi lotsjellës në Kuvend dhe protestat masive në sheshet kryesore të Prishtinës ishin vetëm disa nga zhvillimet kryesore që karakterizuan procesin.
