Droga e konfiskuar në Zubin Potok, Prokuroria Speciale ngritë aktakuzë ndaj pesë serbëve e një gorani
Prokuroria Speciale e Republikës së Kosovës (PSRK), ka ngritur aktakuzë në Gjykatën Themelore në Prishtinë – Departamentin Special, kundër gjashtë të pandehurve Dragoljub Grujic, Bekim Dzafce, Dragan Todorovic, Krsto Duric, Nenad Nedeljkovic, Lubisav Millutinovic.
Gazeta Sinjali kishte raportuar për operacionin e Njësisë së Antidrogës i zhvilluar në fshatin Kovaçi të Zubin Potokut, i cili ka rezultuar me sekuestrimin e 50 kilogramëve substancë të dyshuar narkotike të llojit marihuanë dhe me gjashtë të arrestuar.
“Prokuroria Speciale njofton se të pandehurit D.Gj, D.T, N.N, LJ.M, K.Gj dhe B.Gj., gjatë muajit korrik 2022, në fshatin Kovaq, Komuna e Zubin Potokut, në bashkëpunim janë marrë me kultivimin e bimëve narkotike, në një laborator të improvizuar brenda shtëpisë të njërit nga të pandehurit, ku pas një pune intensive hetimore të policisë së Kosovës në bashkëpunim me Prokurorinë e Shtetit, është arritur deri tek zbulimi i kryerësve të veprës penale të lartcekur, arrestimi i pandehurve, konfiskimi i sasisë narkotike, mjeteve për kultivimin e saj, si dhe pajisjeve ndihmëse.
Me këto veprime të pandehurit D.Gj, D.T, N.N, LJ.M, K.Gj dhe B.Gj., duke vepruar në grup kanë kryer veprën penale “Kultivimi i bimës së hashashit, shkurres së kokainës ose bimëve të kanabisit”, nga neni 272 paragrafi 1 të KPRK- së lidhur me nenin 275 paragrafi 1 nën paragrafi 1.1 të KPRK-së.
Gjatë këtiij aksioni janë sekuestruar edhe pajisje të ndryshme për mirëmbajtjen e laboratorit, mbi 150 bimë të kanabisit, një veturë, para të gatshme në euro e dinar, telefona, si dhe llaptopë.
Për këtë aksion ka shkruar vetëm ministri i Punëve të Brendshme, Xhelal Sveçla, i cili që një kohë po luan rolin e zëdhënësit të Policisë, duke njoftuar për aksionet, para se të lëshojë komunikatë Zyra për Media e Policisë.
