Zveçan, 30 shtator 2025 – Një aksion i përbashkët i Njësisë për Ndërhyrje të Shpejtë (NJNSH) dhe trupave të KFOR-it ka rezultuar me ndalimin e dy personave që kishin hyrë ilegalisht në territorin e Kosovës, përgjatë vijës kufitare në komunën e Zveçanit.
Sipas raportit policor, rreth orës 17:08, përmes vëzhgimit me dron, njësitë kanë identifikuar dy persona duke kryer prerje të pyjeve brenda territorit të Kosovës. Pas ndërhyrjes së menjëhershme, të dyshuarit – meshkuj shtetas të Serbisë – janë ndaluar në vendngjarje.
Gjatë kontrollit, policia ka konfiskuar dy motor-sharra, një palë dylbi, një radiolidhje dhe një thikë, mjete që dyshohet se ishin përdorur gjatë veprimtarisë së tyre ilegale. Megjithatë, pas intervistimit në stacionin policor dhe me vendim të prokurorit, të dyshuarit janë liruar në procedurë të rregullt, ndërsa mjetet e konfiskuara iu janë kthyer atyre.
Ky rast rikthen edhe njëherë në vëmendje problematikën e kalimeve të paautorizuara të kufirit, sidomos në zonat malore ku shpesh ndodhin aktivitete ilegale si prerja e pyjeve, kontrabanda apo lëvizjet e pa kontrolluara të individëve. Autoritetet e sigurisë theksojnë se bashkëpunimi mes Policisë së Kosovës dhe KFOR-it mbetet një element kyç në mbikëqyrjen dhe parandalimin e veprimeve të tilla, duke garantuar ruajtjen e rendit dhe sigurisë në veri të vendit.
Policia ka bërë të ditur se do të vazhdojë me patrullime të rregullta dhe përdorimin e teknologjisë së avancuar si dronët për të identifikuar dhe parandaluar veprimtaritë ilegale në kufi, ndërsa apelon qytetarët që të mos përfshihen në veprime që bien ndesh me ligjin, pasi të gjitha rastet do të trajtohen me seriozitet./Mitropol/
