Turqia nis procedurën e “Njoftimit të Kuq Ndërkombëtar” ndaj Netanyahut

Ministri i Drejtësisë i Turqisë, Akın Gürlek, ka njoftuar se kanë nisur procedurat për lëshimin e një njoftimi të kuq ndërkombëtar ndaj kryeministrit izraelit, Binyamin Netanyahu, dhe Afek Moskovitch, të cilët po gjykohen në Turqi lidhur me sulmin ndaj “Flotës Globale Sumud”, e cila po transportonte ndihma humanitare për në Gaza.

Gürlek ka bërë të ditur se procesi gjyqësor lidhur me sulmin, i cili sipas autoriteteve turke ka ndodhur në ujërat ndërkombëtare, po vazhdon në Gjykatën e 11-të të Veprave të Rënda Penale në Stamboll, njofton Mitropol.

Sipas ministrit turk, në kuadër të lëndës me numër 2026/108 po gjykohen gjithsej 35 persona, mes tyre Netanyahu dhe Moskovitch.

Gjykata e 11-të e Veprave të Rënda Penale në Stamboll më 14 korrik 2026 kishte lëshuar urdhër-arreste ndaj Netanyahut dhe Moskovitchit nën dyshimin për veprën penale të “gjenocidit”.

Gürlek ka deklaruar se Ministria e Drejtësisë e Turqisë i ka kërkuar Ministrisë së Brendshme nisjen e procedurave për publikimin e një “Red Notice”, me qëllim kërkimin e tyre në nivel ndërkombëtar. Dokumentacioni përkatës, sipas tij, më pas i është përcjellë Ministrisë së Jashtme të Turqisë.

Netanyahu dhe Moskovitch po gjykohen në Turqi për një sërë veprash penale, të cilat autoritetet turke i lidhin me ndërhyrjen e armatosur ndaj civilëve që po transportonin ndihma humanitare për në Gaza dhe ndalimin e aktivistëve.

Sipas akuzave të përmendura nga ministri Gürlek, ndaj tyre rëndojnë dyshime për “krime kundër njerëzimit”, “gjenocid”, “privim të kualifikuar të lirisë së personit”, “lëndim të qëllimshëm”, “torturë”, “dëmtim të pronës”, “grabitje të kualifikuar” dhe “rrëmbim të mjeteve të transportit”.

“Ne nuk e pranojmë në asnjë mënyrë kuptimin se administrata e Netanyahut, e cila po zbaton politika gjenocidale në Gaza, është e paprekshme dhe nuk mund të mbahet përgjegjëse”, ka deklaruar Gürlek.

Ai ka shtuar se Turqia nuk do të lejojë që, sipas tij, krimet e kryera në Gaza të mbulohen apo që personat përgjegjës të mbrohen nga “mburoja e mosndëshkimit”.

“Do t’i përdorim me vendosmëri të gjitha mundësitë e së drejtës kombëtare dhe ndërkombëtare”, ka thënë ministri turk.

Gürlek ka deklaruar gjithashtu se Turqia, nën udhëheqjen e presidentit Recep Tayyip Erdoğan, do të vazhdojë të qëndrojë në mbështetje të popullit palestinez dhe se do të ndërmarrë hapat e nevojshëm që, sipas tij, personat përgjegjës për krime kundër njerëzimit të përballen me drejtësinë./Mitropol/