Vetëm gjatë ditës së djeshme, janë raportuar dy raste të dhunës në familje që kanë ndodhur në qytetin e Mitrovicës. Njëri prej tyre është denoncimi i një gruaje, e cila ka njoftuar Policinë për dhunën që po përjeton nga bashkëshorti i saj, teksa në rastin tjetër i dyshuar është një burrë, i cili përfundoi në ndalim pasi familja e raportoi.
Burimet brenda Prokurorisë kanë njoftuar se në rastin e parë, ngjarja ka ndodhur në rrugën “Mbretëresha Teuta”, ku një grua 41-vjeçare ka kërkuar ndihmë me pretendimet se burri i saj A.Q., po i shkakton dhunë fizike psikike, duke e sharë e ofenduar në vazhdimësi.
Sipas dëshmisë të viktimës, të dhënë para hetuesve policorë, telashet në familje po shkaktohen si pasojë e burrit të saj, i cili konsumon alkool në masë të madhe dhe më pas krijon probleme. Si rezultat i denoncimit, Policia është vënë në lëvizje dhe e ka arrestuar të dyshuarin. Me urdhër të Prokurorit të Shtetit, i njëjti është ndaluar për 48 orë.
Rasti i dytë
Sinjali mëson se në rastin e dytë bëhet fjalë për një 61-vjeçar, i cili është denoncuar nga djali i tij, për dhunën psikike që ushtroi ndaj të gjithë familjarëve.
Ngjarja ka ndodhur në shtëpinë e tyre në rrugën e Ulqinit dhe mollë sherri edhe këtë herë, dyshohet të jetë alkooli.
Djali që raportoi rastin, njoftoi se babai i tij konsumon shumë alkool dhe si pasojë e kësaj po shfaq sjellje agresive, duke i sharë e ofenduar anëtaret e familjes. Edhe ndaj tij, Prokurori i Shtetit ka urdhëruar masën e ndalimit për veprën penale “dhunë në familje”.
