Banorët e Skoçanit të Vushtrrisë i drejtohen me peticion Kuvendit Komunal për asfaltimin e rrugës

Me iniciativë të disa ish-banorëve nga fshati Skoçan është organizuar një peticion që i është drejtuar Kuvendit Komunal, i cili përmbanë kërkesën për përfshirjen buxhetore të asfaltimit të rrugës për vitin që po hyjmë.

Përmes këtij peticioni këta banorë po kërkojnë që rruga të përfshihet në planifikimet buxhetore për vitin 2022, që të bëhet asfaltimi i saj si zgjidhje e përhershme për këtë rrugë e cila mbetet vështirë e kalueshme për mjetet motorike si veturat.

Ndër arsyet që theksohen në peticion është vullneti i madh i shumë banorëve dhe ish-banorëve të këtij fshati që kanë shprehur dëshirën për t’u kthyer dhe investuar në këtë vend që është larg vetëm 6 kilometra nga qyteti i Vushtrrisë, por që përshkak të mungesës së infrastrukturës rrugore nuk po mund ta realizojnë këtë.

ish-Banorë të këtij lokaliteti i janë rikthyer me aktivitete të ndryshme 4 vitet e fundit Skoçanit, por që asnjëherë nuk është përfillur përgjatë këtyre viteve kërkesa e tyre për lidhje me asfaltin me komunën amë, Vushtrrinë.

Përveç një shtrese zhavori e vendosur ditëve të fundit,punë të tjera që të lehtësohet qarkullimi në këtë pjesë nuk ka pasur.

Dëshmi për gadishmërinë e banorëve për t’u kthyer janë edhe disa ferma bujqësore që janë hapur në këtë fshat e të cila aktivitetin e tyre e zhvillojnë me shumë pengesa.

Për asfaltimin e rrugës një premtim kishte dhënë banorëve që vijnë nga ky fshat ish-Kryetari i Komunës, Xhafer Tahiri, i cili kishte vizituar fshatin në ditët e para të mandatit të tij qeverisës, duke premtuar asfaltimin e rrugës në vitin vijes 2018, por që ky premtim mbeti i pa-realizuar.

Projekti për asfaltimin e saj ishte bërë në qeverisjen e Mulakut, i cili në një intervistë kishte dhënë se pasardhësi i tij, Xhafer Tahiri, e kishte pasur të gatshëm por që projekti nuk është realizuar.

Duke pasur parasysh këtë neglizhim total për dy dekada, ata që vijnë nga ky fshat si shpresën e fundit po e shohin qeverisjen e re komunale, respektivisht Kuvendin e ri komunal të cilit i kanë drejtuar edhe një peticion si mjetin e fundit juridik për të mundësuar një investim tejet të rëndësishëm që do ta hapte perspektivë dhe mundësi për ata banorë që shprehin interesimin të investojnë në këtë fshat./L.I/VushtrriaOnline