Një rast i falsifikimit të dokumenteve është regjistruar pasditen e së hënës në pikën kufitare Jarinjë. Sipas njoftimit të Policisë së Kosovës, më 9 shtator 2025, rreth orës 16:20, zyrtarët kufitarë kanë arrestuar një shtetas të Serbisë pasi ai ka tentuar të kalojë kufirin me dokumente që dyshohet të jenë të falsifikuara, njofton Mitropol.
Gjatë kontrollit, i dyshuari ka prezantuar një letërnjoftim dhe një patentë shoferi serbe, për të cilat ekzistonte dyshimi i bazuar se nuk ishin origjinale. Dokumentet në fjalë janë konfiskuar nga policia për procedura të mëtejshme.
Pas intervistimit në stacionin policor, me urdhër të prokurorit të rastit, ndaj shtetasit serb është marrë masa e refuzimit të hyrjes në territorin e Republikës së Kosovës.
Policia e Kosovës ka bërë të ditur se mbetet e përkushtuar për të parandaluar dhe identifikuar çdo përpjekje për përdorimin e dokumenteve të falsifikuara, duke theksuar se raste të tilla jo vetëm që cenojnë sigurinë kufitare, por edhe përbëjnë vepra penale serioze.
