Kryetari i Komunës së Mitrovicës, Bedri Hamza nga PDK kishte arritur që në kohën e fushatës zgjedhore të nënshkruante koalicion parazgjedhor me Aleancën Kosova e Re, gjegjësisht me prijësin e saj, Gjergj Bekën, shkruan Mitropol.
Madje, në mbështetje karshi Agim Bahtirit, Bedri Hamzës i doli edhe kreu i AKR-së, Behgjet Pacolli, i cili erdhi për fushatë në Mitrovicë disa herë radhazi.
Koalicioni PDK-AKR vazhdoi të mbetej stabil deri sa erdhi koha për ndarjen e posteve në ekzekutiv.
Në diskutimet finale, Mitropol nga burimet e veta mëson se Pacolli dhe Beka kërkuan nga Hamza 4 poste me rëndësi.
Gjergj Beka i kërkoi Hamzës që ta zgjedh në postin e Kryesuesit të Kuvendit Komunal si dhe t’i ndaj për AKR-në 3 drejtori në ekzekutivin e ri.
Burime të Mitropol kanë bërë të ditur se Hamza ishte i gatshëm që t’i ofronte Bekës vetëm dy nga drejtoritë, andaj edhe erdhi deri tek çarja e koalicionit parazgjedhor.
Pas ‘hidhëtimit’ me Hamzën, AKR dje bojkotoi seancën e dytë të Kuvendit Komunal ku u zgjodh kryesuesja e propozuar nga PDK./Mitropol/
