Imazhet e satelitit tregojnë se Izraeli po ndërton një mur ndarës në Gaza për ta ndarë atë përgjithmonë

Ushtria izraelite po ndërton në heshtje, por me ritëm të shpejtë, një barrierë të madhe prej dheu që ndan më shumë se 50 për qind të Gazës që ajo e kontrollon nga pjesa tjetër e territorit, sipas pamjeve satelitore të siguruara nga Planet Labs PBC. Ky zhvillim e forcon më tej ndarjen e enklavës palestineze me dendësi të lartë banimi, shkruan TRT, transmeton Mitropol.

Më shumë se 23 kilometra barrierë janë ndërtuar gjatë muajve të fundit, duke kaluar nëpër komunitete palestineze që janë shkatërruar nga ushtria. Kjo përbën më shumë se gjysmën e gjatësisë së Rripit të Gazës, i cili shtrihet rreth 40 kilometra në gjatësi dhe 11 kilometra në gjerësi, dhe ku jetojnë mbi 2 milionë palestinezë.

Pasi iu paraqitën pamjet satelitore, ushtria izraelite konfirmoi për Associated Press se ka ndërtuar një barrierë fizike në zonën e të ashtuquajturës “Linja e Verdhë”, kufiri deri ku trupat izraelite u tërhoqën sipas marrëveshjes së armëpushimit të tetorit me grupin palestinez të rezistencës, Hamas.

Kjo linjë ishte parashikuar në marrëveshjen e mbështetur nga Shtetet e Bashkuara si një ndarje e përkohshme e territorit, në pritje të një tërheqjeje më të plotë të Izraelit.

Megjithatë, ndërsa armëpushimi ka mbetur në vendnumëro, duket se Izraeli po konsolidon praninë e tij, duke shtuar frikën e palestinezëve se kjo linjë po shndërrohet në një kufi të përhershëm.

As Komanda Qendrore e SHBA-së (US Central Command), e cila ka për detyrë monitorimin e armëpushimit, dhe as Bordi i Paqes, organi i udhëhequr nga presidenti amerikan Donald Trump që synohet të mbikëqyrë Gazën në të ardhmen, nuk pranuan të komentojnë mbi barrierën.

Përveç barrierës, ushtria izraelite tha se ka krijuar një “zonë sigurie” përgjatë kësaj vije, të pajisur me mjete të inteligjencës dhe teknologjisë. Ajo refuzoi të japë detaje mbi traseun e barrierës ose deri ku planifikohet të zgjatet.

Sipas ushtrisë izraelite, barriera synon të parandalojë infiltrimin dhe të mbrojë trupat izraelite si dhe komunitetet izraelite pranë Gazës.

Ndërtimi i barrierës po përparon me shpejtësi

Që nga hyrja në fuqi e marrëveshjes së armëpushimit, palestinezët në Gaza kanë pasur frikë se Izraeli nuk do të largohet nga zonat që kontrollon. Megjithatë, pak prej tyre duket se janë të vetëdijshëm për digat prej dheu që po ndërtohen përreth tyre, pasi afrimi në ato zona konsiderohet shumë i rrezikshëm.

Sipas pamjeve satelitore të Planet Labs PBC, një pjesë e rrjetit të barrierave në jug të Gazës u zgjat me më shumë se 2 kilometra brenda vetëm dy javësh gjatë këtij muaji.

Më 1 korrik, kjo barrierë ishte rreth 500 metra e gjatë. Deri më 15 korrik, ajo kishte arritur në rreth 2.4 kilometra, duke ndarë rrënojat e qytetit Rafah, të kontrolluara nga Izraeli, nga zona e Muwasit, ku ndodhen disa prej kampeve më të mëdha me tenda të palestinezëve.

Nëse ndërtimi vazhdon në drejtimin aktual, ajo do të lidhet me segmentin më të gjatë të barrierës, i cili shtrihet pothuajse pa ndërprerje për rreth 17 kilometra, nga qyteti jugor Khan Younis deri pranë Qytetit të Gazës në veri.

Sipas pamjeve satelitore, ndërtimi në këtë segment nisi në muajin shkurt dhe puna për ta zgjatur më tej drejt jugut vazhdon.

Më shumë se 1 kilometër iu shtua barrierës midis 21 qershorit dhe 7 korrikut, pranë një baze ushtarake izraelite të ngritur mbi rrënojat e qytetit Bani Suheila, afër Khan Younis.

Në skajin verior të Gazës, disa segmente të veçuara të barrierave prej dheu shtrihen pranë qytetit Beit Lahia, i cili është shkatërruar në masë të madhe.