Kapet pas 5 muajsh i riu që dyshohet se ngacmoi seksualisht një 47-vjeçare në Mitrovicë, Prokurori e liron

Pas pesë muajsh në arrati, Policia e Kosovës ka arritur të arrestojë një person të dyshuar për veprën penale “Ngacmim seksual”, i cili ishte denoncuar në Polici në fund të muajit maj nga një grua në Veri të Mitrovicës.

Siç mëson Sinjali bëhet fjalë për të dyshuarin B.K., 31-vjeçar i cili po dyshohet se ka ngacmuar seksualisht një 47-vjeçare. AI është kapur gjatë ditës së djeshme nga Policia, me ç’rast është shoqëruar në stacion policor, për t’u intervistuar nga hetuesit policorë.

Pasi është përballur me denoncimin kundër tij, burimet thonë se Prokurori i Shtetit ka vendosur që ta lirojë të dyshuarin, i cili do të hetohet në procedurë të rregullt lidhur me këtë rast.

Kujtojmë se rastet e ngacmimeve, sulmeve seksuale e dhunimeve janë rritur me të madhe muajt e fundit në vendin tonë. Madje ka pasur edhe raste tejet të tmerrshme, siç është dhunimi dhe trafikimi i një 11-vjeçareje, rast ky për të cilin 11 persona ndodhen në paraburgim.