Serbët po vazhdojnë me të shtëna në Veri të Mitrovicës, shkruan Mitropol.
Këto të shtëna po ndodhin herë pas here tek liqeni i Ujmanit.
Forcat kriminale serbe më herët u përballën me zjarr edhe nga forcat e Policisë së Kosovës, gjë të cilën e konfirmoi vetë Policia e Kosovës.
Njoftimi i mëhershëm nga Policia:
KOMUNIKATË PËR MEDIA – (Shtesë nr.2.)
Prishtinë, 10 dhjetor 2022
Persona nga grupe të caktuara kriminale të cilat kanë kryer bllokimin e disa rrugëve në veri të vendit, nga lokacione të ndryshme, në tri raste kanë shtënë me armë zjarri në drejtim të njësiteve policore të cilat kanë qenë në detyrë zyrtare në afërsi të pendës së liqenit të Ujmanit, në rrugën që shpie në drejtim të Pikës Kufitare të Bërnjakut.
Njësitet policore, në vetëmbrojtje janë detyruar t’iu kundërpërgjigjen me armë zjarri personave/grupeve kriminale, të cilat janë zmbrapsur dhe larguar në drejtim të panjohur. Po ashtu bazuar në informacionet e siguruara nga njësitet policore në terren, në disa lokacione të ndryshme, janë dëgjuar po ashtu të shtëna me armë zjarri.
Deri më tani nuk ka ndonjë informacion zyrtar për ndonjë person të lënduar apo dëme të mundshme të shkaktuara. Policia e Kosovës mbetet e përkushtuar në realizimin e detyrave dhe autorizimeve ligjore në interes të ruajtjes së sigurisë publike dhe rendit kushtetues.
