Mimoza Kusari e bën Drejtor të KIESA-s zyrtarin e akuzuar për skandalin e rezervave shtetërore
Me një vendim të ministres aktuale, Mimoza Kusari – Lila, Irfan Lipovica është emëruar ushtrues detyre i drejtorit të Agjencisë për Investime dhe Përkrahjen e Ndërmarrjeve në Kosovë (KIESA).
Ish-sekretari i Ministrisë së Industrisë, Ndërmarrësisë dhe Tregtisë, Irfan Lipovica, i akuzuar nga Prokuroria Speciale në rastin e rezervave shtetërore bashkë me ish-Ministren, Rozeta Hajdari, ka marrë pozitë shumë të rëndësishme përbrenda të njëjtit dikaster. Me një vendim të ministres aktuale, Mimoza Kusari – Lila, Lipovica është emëruar ushtrues detyre i drejtorit të Agjencisë për Investime dhe Përkrahjen e Ndërmarrjeve në Kosovë (KIESA).
Sipas dokumentit të publikuar nga Nacionale, Lipovica është emëruar në këtë pozitë që nga data 05 gusht, me nënshkrim të ministres, Mimoza Kusari – Lila, për të cilën s’ka qenë pengesë fakti se i emëruari është nën aktakuzë për dëm gati 3 milionë euro shtetit.
Më 11 nëntor të vitit të vitit 2025, Prokuroria Speciale ngriti aktakuzë ndaj ministres Hajdari, ish-zëvendëssekretarit, Irfan Lipovica dhe drejtorit të Rezervave Shtetërore, Hafiz Gara.
Sipas aktakuzës, ata në bashkëveprim kanë anashkaluar ligjin, duke realizuar blerjen e grurit, vajit dhe sheqerit përmes procedurës së negocimit, ndonëse ligji kërkonte procedurë të hapur.
Ata kishin për qëllim ta kufizonin konkurrencën dhe ta favorizonin një operator të caktuar ekonomik duke i shkaktuar dëm milionësh buxhetit të shtetit.
Në aktakuzë thuhet se Gara, në koordinim me Lipovicën dhe Hajdarin, kishte kërkuar përjashtim nga procedurat e prokurimit, ndërsa Lipovica, më 3 mars 2022, kishte formuar një Komision për negocimin e kontratave, pa asnjë bazë ligjore.
Operacioni i tyre jashtëligjor rezultoi fatal.
Mallrat e rezervave shtetërore u porositën përmes personave privatë e në kompani fantome polake e turke.
Paratë u dhanë e mallrat nuk erdhën kurrë.
I akuzuar në këtë rast është edhe Ridvan Muharremi, mik i kryeministrit në detyrë, Albin Kurti.
