Kryetari aktual i degës së LDK-së në Mitrovicë, Safet Kamberi, ka takuar sot kryetarin e partisë Lumir Abdixhiku dhe kryetarin e Lipjanit nga kjo parti, Imri Ahmetin.
Nga ky takim, Kamberi ka publikuar një fotografi ku shihen duke buzëqeshur, përcjellur me një shënim ku thuhet se “LDK po kthehet në ditët e lavdisë”.
Mirëpo, ndonëse dega e tij u çua në zgjedhje të brendshme për shkak të humbjes, Kamberi ka thënë se po punon në rikthimin e partisë.
“Të buzëqeshur, në shtëpinë tonë politike e cila po transformohet në një subjekt rreth së cilit përbashkohen njerëzit që besojnë në kauzat e saj. Ajo është destinacioni i vetëm i njerëzve që e duan Kosovën një vend normal. Rikthimi në ditët e lavdisë po ndodh, pa fjalë, me punë”, ka shkruar ai.
