LAJME

Shërbimi i detyrueshëm ushtarak në Serbi, Vuçiq: Pa ushtri të fortë, s’mund të keni shtet

Serbia nuk po heq dorë nga rikthimi i shërbimit të detyrueshëm ushtarak.

Kjo u ritheksua edhe sot nga presidenti i këtij vendi, Aleksandar Vuçiq, duke përmendur tensionet në Ballkan dhe gjetkë në Evropë.

Market Florenti
Koha
Florenti Company

Vuçiqi tha se komandantët e lartë të ushtrisë i dhanë atij “një argument të fortë” në favor të rivendosjes së një drafti të detyrueshëm, i cili u pezullua në vitin 2011 në një shtytje për profesionalizimin e forcave të armatosura.

Siç raporton AP, presidenti populist serb nuk specifikoi se kur do të rikthehej drafti. Ai tha se parlamenti kombëtar, i cili dominohet nga aleatët e tij, do të votojë mbi propozimin, i cili vjen pas një fushate të gjatë nga nacionalistët në favor të tij.

“Ne nuk po kërcënojmë askënd”, tha Vuçiqi teksa inspektoi një ekspozitë të pajisjeve ushtarake pas takimit me komandantët. “Sot, nëse nuk keni një ushtri (të fortë), nuk keni shtet”.

“Ne do të shohim nëse ai (shërbimi ushtarak) do të zgjasë 90 apo 100 ditë, apo ndoshta 110 ditë”, u tha Vuçiqi gazetarëve. “Si dhe kur do të prezantohet dhe si do të përmbushen supozimet financiare dhe logjistike”.

Tensionet kanë qenë të larta në Ballkan, i cili kaloi përmes shpërbërjes së përgjakshme të ish-Jugosllavisë në vitet 1990. Edhe pse zyrtarisht neutrale, ushtria serbe ka mbajtur lidhje të ngushta me Rusinë, nga e cila blen shumicën e armëve të saj, duke përfshirë avionë luftarakë dhe tanke, raporton AP.

Edhe pse zyrtarisht kërkon anëtarësimin në Bashkimin Evropian, Serbia ka refuzuar të vendosë sanksione kundër Rusisë për pushtimin e saj në Ukrainë, shkruan më tej AP.

Tensionet janë rrotulluar kryesisht rreth Kosovës, e cila shpalli pavarësinë në vitin 2008, të cilën Serbia dhe aleatët Rusia dhe Kina nuk e kanë njohur. Serbia ka ngritur disa herë gatishmërinë luftarake të forcave të saj në kufirin me Kosovën gjatë disa muajve të fundit.

Serbia ka mbajtur gjithashtu marrëdhënie të përzemërta me NATO-n, trupat paqeruajtëse të së cilës janë vendosur në Kosovë që nga viti 1999.

Një rajon tjetër i paqëndrueshëm është Bosnja, ku udhëheqësi separatist serb i Bosnjës Millorad Dodik ka kërcënuar të shpallë gjysmën e Bosnjës të kontrolluar nga serbët të pavarur dhe ta bashkojë atë me Serbinë fqinje. Dodiku e shoqëroi Vuçiqin në takimin me komandantët e ushtrisë të martën.