E goditi gruan me shqelm në bark, e nxori me forcë nga shtëpia dhe e kërcënoi me jetë – arrestohet 33-vjeçari në Vushtrri, Policia sekuestron dy armë
Një grua nga Vushtrria ka përjetuar momente të rënda dhune, pasi bashkëshorti i saj dyshohet se e ka goditur fizikisht, e ka nxjerrë me forcë nga shtëpia dhe e ka kërcënuar me jetë. Rasti ka rezultuar edhe me sekuestrimin e dy armëve të gjata.
Sipas informacioneve që ka siguruar Sinjali, ngjarja ka ndodhur më 24 tetor 2026, rreth orës 22:40, në rrugën “Ismajl Qemajli” në Vushtrri.
Viktima, A.K. rreth 28-vjeç, ka denoncuar në Polici bashkëshortin e saj, V.Z. rreth 33 vjeç, duke deklaruar se kishte përjetuar dhunë fizike dhe kërcënime serioze.
Sipas deklarimit të saj, bashkëshorti fillimisht e kishte goditur me shqelm në bark, ndërsa më pas e kishte kapur nga krahu dhe e kishte nxjerrë me forcë nga shtëpia, duke e lënë në rrugë.
Gruaja ka raportuar gjithashtu se bashkëshorti e kishte kanosur me jetë, duke bërë që rasti të trajtohej nga organet e rendit si dhunë në familje dhe kanosje.
Gjatë veprimeve hetimore, Policia ka siguruar informacione edhe për praninë e armëve të zjarrit në familje.
Me udhëzim të Prokurorisë, njësia e forenzikës ka sekuestruar dy armë të gjata, ndërsa i dyshuari ka deklaruar se ato nuk ishin pronë e tij, por i përkisnin babait.
Pas intervistimit dhe konsultimit me Prokurorinë e Shtetit, ndaj 33-vjeçarit është caktuar masa e ndalimit prej 48 orësh.
Rasti është iniciuar për veprat penale “Dhuna në familje” dhe “Kanosja”, ndërsa hetimet po vazhdojnë për sqarimin e rrethanave të plota.
Nga informacionet fillestare nuk rezulton se armët e sekuestruara janë përdorur gjatë incidentit, por posedimi i tyre po trajtohet në procedurë të veçantë.
Shënim: Identitetet e viktimës dhe të të dyshuarit janë mbrojtur për shkak të natyrës së rastit. I dyshuari konsiderohet i pafajshëm derisa përgjegjësia e tij të vërtetohet sipas ligjit.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
