Dje gjatë ditës “Mitropol” raportoi për një shpërthim që ishte dëgjuar një natë më parë në veri të vendit rreth orës 02:30 pas mesnate, por jo edhe vendin ku ndodhi shpërthimi.
Ky shpërthim ishte veç vazhdimësi e dy detonimeve të tjera që u dëgjuan po atë ditë dhe një ditë më parë.
Për shpërthimin që ndodhi gjatë ditës së shtunë Policia tha se ishte mjet piroteknik i hedhur nga maturantët.
Por, si për t’u mos mjaftuar me kaq, “Mitropol” mëson se po atë natë, ishte vet stacioni policor cak i sulmit me mjet shpërthyes.
Siç mëson “Mitropol”, mjeti shpërthyes detonoi hapësirën e oborrit të stacionit të Policisë së Kosovës në Mitrovicën Veriore, i cili ndodhet në Lagjen e Boshnjakëve.
Policia nuk ka arritur t’i identifikoj sulmuesit por as nuk ka njoftuar fare për shpërthimin e ndonjë mjeti në oborrin e vet, gjersa në kohën kur u dëgjua shpërthimi brenda stacionit ndodheshin mbi gjashtë zyrtarë policor./Mitropol/
