Vushtrriasi e kthen ahengun familjar në “film aksion” – shtie me armë, përfundon në duart e Policisë

Një dasmë familjare në rrugën “Jeronim De Rada” në Vushtrri ka marrë kahje të papritur mbrëmjen e së dielës, kur një qytetar vendosi ta “kruajë gishtin” mbi këmbëzën e një arme zjarri. Incidenti ndodhi më 4 gusht 2025, rreth orës 21:00, kur i dyshuari, një mashkull kosovar, dyshohet se shtiu me armë gjatë ahengut, shkruan Mitropol.

Policia e Kosovës, e njoftuar për të shtënat, ka reaguar me shpejtësi duke dalë në vendin e ngjarjes. Aty, sipas burimeve policore, i dyshuari është arrestuar dhe nga ai është konfiskuar arma e zjarrit së bashku me një karikator dhe një gëzhojë, si prova materiale.

Pas intervistimit në stacion policor dhe konsultimit me prokurorin kujdestar, ndaj të dyshuarit është iniciuar procedurë për veprën penale “Përdorim i armës” dhe “Armëmbajtje pa leje”. Megjithatë, me vendim të prokurorit, i dyshuari është liruar në procedurë të rregullt, ndërsa pritet që hetimet të vazhdojnë në ditët në vijim.

Ngjarje të tilla po bëhen të shpeshta në ahengjet familjare, ku shpesh gëzimi i tepërt tejkalon kufijtë e arsyes dhe shndërrohet në shkelje të ligjit. Policia ka apeluar vazhdimisht për vetëpërmbajtje dhe respektim të rendit publik, sidomos gjatë festimeve familjare./Mitropol/