Zyrtare: Ndeshja e fundit Trepça-Prishtina luhet të dielën

Pas disa ndërrimeve të datës së zhvillimit të ndeshjes basketbollistike mes KB Trepça dhe KB Sigal Prishtina, tashmë është vendosur zyrtarisht data, shkruan ‘Mitropol’.

Të dielën më 30 prill do të luhet ndeshja e fundit mes KB Trepça dhe KB Sigal Prishtina.

Njoftimi i plotë nga FBK:

Komisioni i Garave i Federatës së Basketbollit të Kosovës (FBK) sqaron për të gjitha palët që termini i ndeshjes, sipas Propozicioneve të Garave të FBK-së duhet të bëhet i ditur 72 orë para fillimit të ndeshjes. Duke u bazuar në këtë parim, kemi shqyrtuar kërkesën e KB Sigal Prishtina për shtyrje të ndeshjes. Kujtojmë që KB Sigal Prishtina fillimisht ka kërkuar që ndeshja të shtyhet nga termini i paraparë të enjten, në të premten më 28 prill. Sot (e martë, 25 prill) ndërkohë e ka dhënë edhe një datë alternative, për të mërkurën, 26 prill.
Rrjedhimisht, cilido caktim i terminit për datën 26 prill, nuk është as i shqyrtueshëm, meqë afatet e këtilla nuk parashihen në Propozicione të Garave.
Duke u nisur nga situata e krijuar dhe faktet ne vijim:
1. Kërkesa e KB Sigal Prishtinës që ndeshja të shtyhet
2. Kërkesa e klubeve që ndeshjet e play-offit të zhvillohen me gjyqtarë të huaj
3. Mirëkuptimi që ka FBK për ndeshjet ndërkombëtare të FHK-së
4. Mungesa e gatishmërisë së KB Trepçës që të zhvillojë ndeshje jashtë termineve të parapara me PG
5. Mungesa e gatishmërisë se klubeve që të pajtohen për termin të ndeshjes e shtyrë
6. Gatishmëria e FBK-së që të mund të sigurojë gjyqtarë të huaj të dielën, me 30 prill

Komisioni i Garave i FBK-së vendos që ndeshja e pestë gjysmëfinale në serinë KB Sigal Prishtina vs KB Trepça të zhvillohet të dielën, me 30 prill.